[شهاب الجزيرة]

أول شي بعرفكم على صديقة عزيزة علينا كلنا .. أعرفكم على "دائرة الألوان"..



كلنا نعرف الألوان الأساسية (الأحمر، الأصفر، الأزرق) ، إذا أخذنا كل لون من هالألوان و حطيناه بزاوية مثلث ، و بعدين بين كل لونين حطينا اللون اللي ينتج من مزجهم راح يطلع لنا شكل مشابه للشكل المرسوم فوق.. و اللي يطلق عليه اسم دائرة الألوان.

إنزين شنو فايدة درس الإبتدائية هذا؟

الفايده أكبر من ما تتصور! فدائرة الألوان هذه هي حجر الأساس لعلم يطلق عليه اسم "نظرية اللون"
(Color Theory)
من هذا العلم سنتحدث اليوم عن علاقة لونية مهمة لكل فنان تشكيلي و مصور.. الا وهي علاقة "التكامل اللوني".

كل لون في دائرة الألوان له لون مكمل له
(Complementary Color)
فكيف نعرف هذا اللون المكمل؟

أبسط الطرق هي بالنظر إلى دائرة الألوان نفسها..

ما هو اللون المكمل للون الأحمر؟

اللون الأخضر

ما هو اللون المكمل للون البرتقالي؟

اللون الأزرق

شالسالفه؟ ليش قلنا الأحمر مع الأخضر؟ و ليش الأزرق مع البرتقالي؟

الجواب ببساطه هو إن اللونان المتكاملان هما كل لونين متقابلين في دائرة الألوان.

يعني اللون المكمل للأصفر هو......

برافو عليك..

البنفسجي

طيب..

عرفنا الحين شنو اهيه الألوان المتكامله... شنو فايدتهم لنا كمصورين؟


علاقة التكامل اللوني هي علاقة سحرية و تسوي العجايب اذا استخدمت صح ، فكل لونين متكاملين هما بنفس الوقت متضادين ، شنو يعني متضادين؟ ينعني يكسر كل واحد منهم حدة الثاني ، يعني اذا استخدما بنسب سليمة ممكن نصلح ألوان الصورة بإضافة عنصر صغير له لون مكمل للون السائد .. و بالتالي نحقق توازن لوني جميل يخدم الصورة بشكل سحري.. مثال:

اللون السائد بهالصوره هو اللون الأزرق المخضر شوي ، بالأحوال العادية كان ممكن نعتبر هالصوره فاشله نوعا ما .. لأن الوايت بالانس مالها غلط و مؤذي للعين ، لكن عنصر واحد صغير هو اللي وازن الصوره... السطل ، اللون البرتقالي المحمر للسطل عادل و وازن اللون السائد للصورة و بالتالي أعطاها حياة و حيوية كانت فاقدتها... مو قلتلكم سحر

اللون المكمل كذلك يمكن يستغل بصوره ثانيه ، من خواص اللون المكمل هو انه يبرز اللون اللي يكمله .. يعني يسوي حالة تباين
(Contrast)
مثلا اذا كنت بتصور مودل لابس فانيله صفره .. و انت قاصد انك تبرز هاللون بالذات لا تصوره على خلفيه برتقاليه أو حمره.. خل خلفيتك فيها نسبه من اللون البنفسجي أو أحدى درجاته ، مثال على التباين اللوني:



ترى هل كان احمرار الفراوله سيبرز بهذا الشكل لو كانت الخلفية بلون غير الأخضر؟

مفهوم التكامل اللوني من أهم المفاهيم اللي تفيد المصور الهاوي و المحترف ، ما أقول ان كل صورنا لازم يكون فيها تكامل لوني ولا ما راح تطلع حلوه! لكن اذا فهمنا فكرة التكامل لا إراديا راح نبدي نحس بالألوان من حوالينا بشكل أفضل .. و يصير اختيارنا لها مدروس و بعيد عن العشوائية ، شوف الطبيعه من حولك و تأمل اللوحات اللي رسمها لنا الخالق سبحانه و لاحظ العلاقات اللونية ما بينها و راح تحس بالمعنى الحقيقي للفن و الإبداع.

مزيدا من الأمثلة على التكامل اللوني:











البني و البيجي و العاجي (الحليبي) و الرمادي بدرجاته بالإضافة إلى الأبيض و الأسود كلها (بدرجات معينة) تسمى ألوانا محايدة (Neutral Colors)



و أركز هنا على مسألة "الدرجات المعينة" لأن البني مثلا قد يكون أقرب للأحمر و بالتالي يعامل معاملة الأحمر.

الألوان المحايدة تنتج عند مزج لونين متكاملين ، لهذا السبب ما بينت بدائرة الألوان اللي حطيتها فوق، كذلك يمكن "تحييد" أي لون تقريبا بإضافة اللون الرمادي له .. لكن بما إن احنا مصورين و مو رسامين راح نكتفي بالقول إن الألوان المحايده هي الألوان اللي ذكرتها فوق و هذي أمثله عليها:



أدري الصوره مو ذاك الزود لكن المهم إن تكون عندنا فكره عن "بعض" الألوان المحايده.


إنزين.. شنو فايدة هالألوان؟

فايدتها كبيره ، أولا، من إسمها.. هي ألوان محايده.. يعني تمشي مع كل شي ، لذلك فهي مناسبة جدا للخلفيات لأنك تقدر تحط أي لون جدامها و إنت متطمن إنها ما راح تخرب الدنيا.. خاصة إذا ما كان عندك روح المغامرة ، لذلك -باستثناء مصور الجمعية الهندي- تستخدمها أغلب أستوديوهات التصوير للبورتريهات.

ثانيا ، تكسر حدة الألوان بالصوره و تعطي العين إحساس بالراحه ، بالتالي استخدامها بنسب و تكوينات معينه ممكن إنه يخدم الصوره بشكل كبير و يهدي جنون الألوان اللي فيها.

ثالثا، وهذي مهمة و صعبه بنفس الوقت ، من الممكن إن اللون المحايد بالصوره ، اذا استخدم بشكل معين، يساعد على إبراز العلاقات اللونية بالصوره.. خصوصا التكامل اللوني ، فاللون المحايد بهالحالة يكون مثل اللوحة الفاضيه.. كل شي تحطه عليها يبين و يبرز لأن اللون المحايد بروحه يعتبر لون ميت.


ملاحظة أخيره بخصوص الألوان المحايده.. و هي إن البعض يسميها الألوان الترابية أو الألوان الأرضية
(Earth Tones)

[Pilot of the UAE]

يسعدني ان اكون اول من يرد عليك
والله موضوع رائع وباين انه متعوب عليه
مع أني ما فهمت شي!
ان شا الله لما اتعمق في هذي الهواية بفهمها
تقبل مروري

[حسونه]

مشكور شهاب الجزيرة على الموضوع الرائع

[هنـــد]

شكرا بو شهاب عالمعلومات الحلوة عن الالوان في التصوير

[Royal]

مشكور أخي الحبيب على هذا الدرس الطيب والهام والجميل ، وتقبل مروري .

[edge]

الله يعطيك ألف عافيه ياكابتن شهاب ..
الموضوع مفيد جداً .. واكتسبت معلومه جديده تفيدني في التصوير
بس للاسف حزات تنجبر على التصوير في اماكن غير ملائمه لتصوير
تسلم كابتن شهاب على الموضوع والشرح الرائع

[الاجدل]

الله يعطيك الف عافيه كابتن شهاب


للمعلوميه ياشباب اللي يقول تنجبر على تصوير في محلات غير مناسبه او وين نلاقي هاللقطات

هي لقطات عادية في اي محل

لاكن لعب الفتوشوب صار اساسي جدا جدا في اي عمل فني فتوغرافي

وبالعكس اللي ما يستخدم الفتوشوب تلاقي صوره فيب المساباقات مستبعده لفقدانها بعض الجماليات والنعومه المطلوبه في الصور


الاخ الكريم شارح الموضوع استخدم عباره والوضع الاساسي في غلط اللي هي الالوان المحايده وحط مجموعه الوان

الالوان المحايده
فالالوان المحايده فنيا معروفه بلونين
اللي هم الاسود والابيض
لانه لا يأتون بلون جديد بل يغيرون من درجات الون المضافه له لان يكون فاتح او غامق
وهذا سبب تسميتها بالمحايده


واضافه لهذي الاوان فهناك الالوان الحاره
وهي التي توجد في الوان الشمس لكي ابسط لكم المعلومه
الاحمر وتدرجاته للوصول للون الاصفر
وهي الوان قويه التأثير النفسي الغير محبب لما لها من تأثير قوي على البشر نفسيا


بعدها الاوان البارده وهي الالوان التي توجد في الارض
الاخضر والازرق والبني
وسميت ببادره لعدم حراره اللون في التعبير ووضعه في الطبيعه فهي عاده وخاصه الاخضر والازرق منبع هدوء وراحه نفسية كبيره للانسان فكل الناس تختلف في الوانها وتتفق على هذاي اللونين

ومن اهم استخداماتها في غرف العمليات لتهدئه الطاقم الطبي من افرازات اللون الاحمر على الطاقم فهو لون مثير اثاره غير محببه فيكون اللون السائد في الغرفه اخضر لذالك السبب

ان شاء الله اكون قدمت القليل من شرح الالوان كل التحية للجميع

[SCORPIONS 47]

مشكور اخوي كل الشكر و التقدير لجهودك ........

[Captain-Ahmed]

موضوع قييم جدا .......

شكرا يا كابتن شهاب !