[متحطم]

بسم الله الرحمن الرحيم

السلام عليكم ورحمة الله وبركاته

كيفكم ان شالله بخير ؟؟

بقولكم سالفتي :
انا قدمت ع الاكاديميه قبل فتره وقالوا نرد عليك بعد ثلاث شهور
المهم نسيت امر الاكاديميه وسجلت بجامعة طيبه قسم علوم ماليه واداريه ( سنه تحظيريه )

ويوم الاربعاء خلصت كل اختباراتي والحمدلله نجحت بكل المواد الا الانجليزي رسبت فيها لأني اخذت فيها حرمان بسبب كثرة غيابي لظروفي الخاصه وقالوا لازم تاخذها صيفي ..

المهم امس اتصل علي واحد من الاكاديميه وقال لي انت مقبول بالآكاديميه وموعد اختبارك يوم الاحد 2/8 للمراقبه الجويه ,,,, ويوم الاثنين 3/8 اختبار الاطفاء والانقاذ

اخواني تكفووون ساعدوني وربي اني محتار مآآآآآره ما أدري انا اسجل بالاكاديميه واسحب ع الجامعه او اني ابقى بالجامعه

تكفون ساعدوني انا ما اوثق الا فيكم انتوا لأنكم اصحاب خبره في هذا المجال

سألت ابوي وقال اللي يريحك سجل فيه ما اعطاني رأي
علماً بأن مستواي بالانجليزي متدني شوي

انا خايف ادرس بالاكاديميه وما اتوفق بدراستي فيها بسبب صعوبتها

وبسألكم كيف مستوى الدراسه في قسم الاطفاء والانقاذ ؟؟
هل هي صعبه ولا سهله ؟؟
وايش هي المواد اللي تدرسونها ؟؟
وكمان سمعت انو اللي يرسب في اي اي ماده يطردونه من الاكاديميه هل هذا الكلام صح او لا ؟؟

انتظر ردكم

تكفوووووون ساعدوني والله ما لي الا الله ثم انتوا
الله يوفق ويسعد اللي يساعدني ويااارب يحقق له كل امنياته

تحياااااتي

[@@@]

هلا اخوي

بالنسبة للانقاذ والاطفاء هذه مدري عنها ياليت تسال القسم حقهم اما بالنسبة للمراقبه الجوية فهي وظيفه مهمه وحساسه وصعبه فنفس الوقت بس هذا مو عائق اللي ابغى اقولو انو اذا اجتزت جميع الاختبارات وكان عندك القدرة وكنت مؤهل لذي الوظيفه فلا تفوتها وبالنسبة للغه فلا تشيل هم السنة الاولى كلها لغه يعني باذن الله تتعلم وتتحسن فيها

[THE LORD KSA]

حبيبي متحطم اسمك لايكون عنوانك في الحياة عزيزي

مبروك نجاحك بالجامعه وانصحك من كل قلبي تروح للاكاديميه وتختبر وتجرب حظوظك
واذا نجحت باذن الله استخر الله ثم اسشتر والديك واقاربك واصحاب الخبره
واعتقد اللي تخرجوا من الاكاديمية ليسوا بافضل منك انت قدها وقدود باصديقي

مثل ماقلت لك جرب حظك وشوف ان لقحت والا ماضرها الفحل هههههه مثل احب اقوله

وتمنياتي لك بالتوفيق

[panther]

انصحك بعدم ترك الجامعة حتى لو انتساب كمل دخولك للاكادمية اذا مشت امورك كان بها واذا ماصارت الجامعة موجودة والله يوفقك

[aseralshamal]

-

ياهلا فيك أخوي
انا حاس في الشي اللي انت فيه لكن انت الله يهديك كبرت الموضوع بشكل أكبر مما تتصور
اول شي السؤال دائما يكون لله والاستخارة اهم شي صل صلاة استخارة وشوف ربك وين يوجهك
لان الله هو الوحيد اللي يدلك على الطريق الصحيح بأذن الله

بالنسبة لي اللي فهمته من كلامك انك الى الان مانقبلت بشكل نهائي بالاكاديمية وباقي لك اختبارات
بوجهة نظري يومين ماراح تضرك رح واختبر وسو اللي عليك عشان ترضي نفسك قبل كل شي
واذا الله وفقك ونجحت في الاختبارات كمل فيها اذا مستقبلها افضل لاني لا أملك اي معلومة عنها
واذا لاسمح الله ماعديت الاختبارات ارجع للجامعة وكمل وتكون راضي من نفسك لانك اقل شي اختبرت وربي ماوفقك فيها
لكن لو ماختبرت وانت نفسك فيها صدقني بتندم طول عمرك عليها وتقول ( ياليتني اختبرت ) !!

الله يوفقك ي رب ويهديك للطريق السليم والصحيح لك
ادع ربك وصل وان شاء الله يزول عنك كل شي

دعواتكم لي ولجميع الاخوان اللي موجودين فنحن بأشد الحاجة لدعوات صادقة من القلب

أخوك /
عبدالعزيز