[ملك السما]

تيمان وتلاته غنمايات

نفيسة الشايقية في حلتنا عندها تيمان وتلاته غنمايات معذبنها عذاب الله اكبر ،، التيمان شقاوتهم عينة ومشاترين في الشقاوة،، اليوم كلو هي تساكك في الغنمايات والتيمان تقبض الغنم التيمان يجرو منها تلحق التيمان الغنم يشردن\،، وهي اليوم كلو يا ساكة التيمان يا ساكة الغنم،، ناس الحله متمنيين يوم واحد يشوفوها ماشه براها ومرتاحه من غير مساككة ومعافرة مع الغنيمات والوليدات.
فتح الله بتاع الدكان قال يساعدها ينهر التيمان عشان يخلو الشقاوة دي اريتو اكان ما سألهم،، الشفع هاجو واتوحشو وكل واحد شال ليهو حجر وخلو ليهو الدكان ذي الكان فيهو مظاهرة فلسطينية،، الحجار بفن اكتر من البضاعة،، حاج الشفيع قال ليهو يا فتح الله ياخوي دكانك ده تاني ما بنفع إلا مغلق مواد بناء.

حاجة نفيسة قالت تدخل الشفع المدرسة عشان ترتاح شوية من دوشتهم وبعد ده هم خلاص وصلو العمر البدخلهم المدارس،، أول يوم للمدارس من الصباح تلبس فيهم بالقوة تخلص من واحد بس ما تلحق تقبل على التاني تلقاهو ملص هدومو كلهن وقعد شلهوب في الصقيعة، تمسكو تلبسو تاني،، تتلفت تلقى اخوهو قام جاري وواقف في نص السهلة في الشارع،، المسكينة واقفة جمب الباب وتكورك ليهو وهو ولا جايب خبر،، الحلة كلها تنهر في الشافع وهو ما سائل في زول،، حاج يسن قبض ليها التوم المشاتر ده ورجعو ليها،، ادتو رصعتين في الباب ودخلتو ،، بعد شويه جا مارق واحد فيهم ما عارفو القبضو حاج يسن ولا التاني الكان جوا البيت ،، وخامي هدوم البيت كلها في ايدو ومعاهن توب حاج نفيسة وعدييييييييل على قدرة فتح الله بتاع الدكان وحشر الهدوم كلهن في النار،، فتح الله يكورك من جوا الدكان وجا جاري يلحق الهديمات بي عود وقعد ينكت فوقن لي برا،، الشافع المسلط بي كل قوتو دفر القدرة في حاج فتح الله،، خلاهو يصرخ بي طول حسو،، الحلة كلها اليوم داك فطرت دكوة،، وشالو معاهم دكوه لي حاج فتح الله في الاسبتاليه. .

التيمان لي هسي مافيهم واحد وصل باب المدرسة.

الترجمة ...

الشايقية = قبيلة فى شمال السودان
حلتنا = قريتنا
عزاب الله اكبر = يقصد تعبوها شديد وعزبوها
شقاوتهم عينة ومشاترين = يعنى اشقياء لدرجة ومتفردين فى الشقاوة
تساكك = تطاردهم
براها = لوحدها
معافرة = مقاومة
الوليدات = الاولاد
ينهر = يشخط او يشاكل
اريتو = ياريت لو
لاشفع هاجو = اى الاولاد عاملين جوطة وهيجان
شال = اخذ شي
ملص هدومو = اى خلع ملابسه
الصقيعة = اى البرد الشديد
جمب الباب = قرب الباب
تكورك = تنادي وتثتغيث
جا مارق = اى خرج
خامى هدوم = اخز ملابس كثيرة
الشافع المسلط = اى الولد الشقى
دكوة = الفول السودانى المسحون
القدرة = الماعون الزى يطهي فيه الفول المصري

[ملك السما]

لم استطيع وضع القصة فى المنتدي الادبي لانى لا املك صلاحية عفوا

[mudather87]

its very nice , i love it .

thanks for that

[ملك السما]

اقتباس:     المشاركة الأصلية كتبت بواسطة mudather87  

its very nice , i love it .

thanks for that

اشكرك على مرورك الكريم

[ملك السما]

الموضوع منقول طبعا