[شهاب الجزيرة]

بسم الله الرحمن الرحيم
أسعـد الله أوقاتكم بكـل خير
عندي موضوع اليوم .. ودي اكتب وجهة نظري فيه ,, واكيد اتمنى اشوف وجهات نظركم في هذا الموضوع ..

موضوعنا اليوم يتكلم عن ( آهات في مطاعم المطارات )

الكـثير منا في المملكة العربية السعودية او حتى من خارجها , غادر أو وصل الى مطاراتنا السعودية ..
ولعل مطار الملك عبدالعزيز في جدة هو الأكثر زيارة من الوفود الأجنبية .. نظرا ً لكثافة الحجاج والمعتمرين ..
في البداية .. خلوني اتكلم بالعاااامية ,, عشان اطلع الحررررة مضبوط

الجـشــع هو العنوان الأبرز في مطاعم المطارات والمقاهي المنتشرة ..
جـَـشـَع بكل ماتعنيه الكلمه من معـنى .. ناهيك عن المحلات الثانية ,, محلات العطورات .. والاتصالات .. والاحذية - اعزكم الله - والمكتبات ... الخ
لكن خلوني اليوم اركز على موضوع المقاهي والمطاعم في المطارات السعودية ..
انا رحت كثيررر لمطار الملك خالد الدولي في الرياض .. ورحت كثيررر لمطار الملك عبدالعزيز في جدة ..
الملاحـظ .. في هذي المطاعم والمقاهي .. هو الاستــغلااااال الفاحش للمسافرين
اسعااار مضااااعفة اكثر من ست او سبع اضعاف عن الاسعار خارج المطار !!
وللأسف في جميع الاصناف ... يعني الارتفاع ماهو حكر لـ صنف دون آخر !!
محلات الاحذية والاكسسوارات وغيرها ... قد يجد صاحبها أو حتى البائع , مخرج من حرج السؤال ,, في حال تم توجيه السؤال له .. عن سبب ارتفاع اسعاره !!
يمكن يقول صاحب هذي المحلات .. اي عذر ,, لأنه يبيع سلع اسعارها غير ثابته .. الدول المصنعة لها مختلفة .. تكلفتها مختلفة .... الخ
لكن المصيبة في السلع اللي اسعارها معروفة وثابتة ...!!
مثال .. علبة البيبسي ,, سعرها برا المطار ريال ,, لكن تدخل المطار , عشان تشتري علبة بيبسي لازم تدفع 6 ريال !!
المويه .. عشان تشتريها لازم تدفع 5 ريال , يعني لو انت رايح مع عائلتك .. وتبون تشربون مويه ,, وكان عددكم 5 اشخاص
راح تدفع 25 ريال عشان تشترون 5 علب مويه ...!!

انا قبل ايام .. كنت في مطار الملك عبدالعزيز في جدة ... وكان الوقت في الظهر
كنت ابي افطرقبل اقلاع الطيارة ... رحت لأحد المطاعم ..
( فطور الظهر .. سلكوا لي لا تدققون )
لقيت عنده كروسان بالجبن .. سألته بكم ؟
قال ما تقدر تطلب كورسان لحالها .. لازم تطلبها مع وجبة !!
طيب لو اني ما ابي وجبة وش السواة ؟؟ بس ابي كروسان !!
قال لا .. لازم وجبة ..!!
قلت طيب .. الوجبة وش يجي معها ؟؟
قال معها كاس عصير وصحن صغير سلطة
قلت طيب بكم هالوجبة ؟
قال 35 ريال .......!!!

كان فيه جنبي ثلاثة شباب .. شكلهم يبون يتغدون ,, قالوا بكم نص حبة مع الرز ؟؟
قال 49 ريال ......!!!! طبعا سعر نص حبة مع الرز برى المطار 10 ريال ..
تركت هالمطعم .. ورحت لواحد ثاني ,, تذكرت يوم شفته اني قد شريت منه وجبة لأخوي .. وجبة كروسان وعصير وبطاطس .. بسعر 40 ريال !!!
لقيت واحد هندي يتمشي بالمطار .. معاه عربية وفيها كروسونات وسندويشات وبباسي ومويه وبايسن وكاوكاوااات وشغل مرررتب ..
قلت عاد هذا .. هو اللي اسعاره زينه ,, على الاقل لعل وعسى يبيع المويه بريالين ,, بزيادة ريال عن خارج المطار
قلت بكم المويه ... قال ثلاثة ريال ( جزاه الله خير .. بس زيادة ثلاث اضعاف عن السعر العادي )
والكروسان الصغيره اللي بريال .. سعرها ثمانية ريال
والجوكليت اللي بريالين .. سعره خمسة ريال ..
والشاهي بأربعه ريال ..

لعنبو بلبسكم .. علبة ليبتون بثنعش ريال .. وتقعد اسبوع او اكثر
اووووه نسينا المقاهي .. المقااااهي يبي لهم الظاهر موضوع لحاله ,, اسعاااار خرافية .. كوب شاهي اصغر من النملة ( اتعب انا على الوصف ) تلقاه بتسعة ريال .. عااادي
لا ويمكن اذا طلبته وجابه لك على الطاولة .. اذا جيت تحاسب قالك 11 ريال !!
عشان السيرفس 20% وسسسسسع صدرك .. مادام ماحولك احد
كني اشوف واحد منكم .. يقول ياااااخي ترى الايجار عندهم غااااالي ,, بعذره لو يرفع الاسعار .. معه حق ,, بعدين ياخي انت مو مجبر .. تبي تشتري ادفع , ما تبي لا تدفع ..

طيب .. عطوني مبلغ فلكي .. مبلغ خراااافي .. ممكن انه يكون ايجار للمحل هذا ؟؟ علما ً بأن مساحة المحل ماتتجاوز 15 متر
يعني كم ايجار المحل بالسنة ؟؟؟ نقول مية ألف ؟؟ نقول ميتين ألف ؟؟
نقول ربع مليون ؟؟
طيب خلونا نقول ان ايجار المحل نص مليون ( 500 ألف ريال ) ... حلو ؟؟

طيب خلوني اقولكم معلومة عن مطار الملك خالد في الرياض ..
سألت احد موظفي المطار .. كم رحلة يوميا في مطار الملك خالد ؟؟
قال المتوسط المتوسط ... 180 رحلة يوميا ....!!! ولكن بعض الايام توصل 300 عااادي ..
طيب خلونا ناخذها بالمتوسط زي ما قال ..
كل رحلة من هالرحلات الـ 180 ,, بيكون فيها كم راكب ؟
نقول 100 راكب ؟؟ مع انه اكثر .. بس خلونا نقول 100 راكب ..
اذا كان في كل رحلة يوميا ً 100 راكب , وعندنا 180 رحلة ( متوسط عدد الرحلات اليومية )
هذا يعني انه عندنا 18000 راكب يوميا ً ..
لو قلنا كم راكب من هذا العدد الكبير .. راح يفطر او يتغدى او يتعشى او يتقهوى ...؟؟

ماراح اقولكم خلونا نقول نص هالركاب بيشتري شي ,, لكن خلونا نقول ان 40% منهم بياكل او يتقهوى .. خصوصا ً ان مواعيد اقلاع الرحلات عندنا ماشاء الله .. تمشي بالضبطططط بنفس الوقت اللي يقولون !!!!!!
اغلب الرحلااااااات تتأخر .. مير تأخير ساعتين ذي مافيها طقة عصا .. بااااردة على القلب
من شان هيك .. تلقى اللي يتأخرون .. يا يتقهوون او ياكل شي .. او يخلي عياله ياخذون عصيرات والا عسكريمات ...
اذا قلنا 40% من الركاب راح ياخذون من هالمطاعم او المقاهي ..
معناته انه عندنا 7200 راكب يوميا ً يشتري من المقاهي او المطاعم ( 18000 * 40% )

انتم لاحظتوا بعض الاسعار اللي قلتها لكم .. واللي كثيررررر منكم لاحظها بنفسه ..
عطوني مبلغ تتوقعون انه راح يدفعه كل شخص منهم ..
اذا كان سعر الوجبة 35 او 40 , والمويه 5 ريال والببسي 6 ريال .. والشاهي 9 ريال .. والحلويات والكيك 15 ريال وفيها ...
يعني خلونا نقول متوسط المبلغ اللي راح يدفعه كل شخص في حدود 15 ريال !!
معنى هالكلام انه بيكون عندنا المجموع 108.000 ( 7200 راكب * 15 ريال )
هذا متوسط الدخل اليومي لمطاعم المطارات ,, اعتقد فيه مطعمين او ثلاثة فقط ( ما اتكلم عن المطاعم المعروفة .. دومينيز بيتزا وكودو وماكدونالدز وغيرها ... )

اتكلم بس عن المطاعم الصغيرة اللي في المطار ..
خلونا نقسم هالمبلغ على ثلاث مطاعم ..
108.000 / 3 = 36000 ريال
هو متوسط الدخل اليومي للمطعم في مطار الملك خالد بالرياض
معنى هالكلام ان المطعم في أقل من 14 يوم يقدر يدخل مبلغ الايجار حق المحل .. واللي قلنا انه نص مليون ريال ..!!
لأن 36000 ريال * 14 يوم = 504.000 ريال
في اسبوعين فقط
انا ما أحسـد احد على الربح ... لا والله , ولكن هذا اسمه استـــغلال يا جماعة الخير ...!!

هذا اسمه جــــــــشــــــــــع !!!

وين حماية المستهلك عن هذا الإحتيــــــال ...!!!
وين المسؤول عن هذي الأسعـــــــار ....!!!
انا ماني مقتنع أبد بمقولة " تبي تشتري ادفع .. ماتبي انت مو مجبر على الشراء "
هذي المقولة فيها لوي ذراااااع يا جماعة الخير ...
هذي اسعار معروفة ... كيف ترتفع بهالشكل هذا ....!!!
يمكن نقول معه شي من الحق .. لو ارتفعت الاسعار الى ضعف او حتى ضعفين !!!
لكن اللي نشوفه .. ان الاسعار مضااااعفة 6 او 7 او حتى 8 مراااات ....!!!
هذي وجهة نظري كتبتها لكم ... لايمكن ان تكون صائبة تماما .. ربما يتفق معي البعض فيها .. ويختلف معي الكثير


الموضوع صراحة يستاهل النقاش
وللامانة اللي كتب الموضوع معاه حق

[إمبراطور الطيران]

الله يعين بس
احب اوضح نقطة

بالنسبة لمطار البحرين الدولي فأسعار الأطعمة هي نفسها في الخارج

على سبيل المثال مطعم جسميز

سعر الوجبة مثلا بثلاثين ريال ايضا خارج المطار ثلاثين
هناك مطاعم اخرى ايضا ربما اسعارها تزيد تبعا لإدارة المحل ولكن نادرا

ربما تزيد اسعار السوق الحرة

ولكن ربما تلقى فيها حاجات ارخص من السوق الي بره!!
انا عن نفسي الوالد اشترى كاميرا من محل في السوق الحرة في المطار

كانت ارخص ب200 ريال عن السوق الخارجي !!


وجهة نظر
تحياتي

[شهاب الجزيرة]

كابتن محمود

اذا كنت بتشتري من سلسلة مطاعم مشهورة

فسعرها في الاساس مرتفع في الخارج

لان اسعارها موحد في جميع المناطق

لكن مثلا الماء يباع في الخارج بريال

وفي المطار بـ 5 ريال
وبعضهم بـ 10 ريال

ليش وش الرق بين هاذي المويه اللي عندنا والمويه الي في المطار

انا لما اكون في المطار يجي في بالي ان الموية ممكن تكون مقريه او زمزم


لازم يتم توحيد الاسعار في المطار وخارج المطار

[إمبراطور الطيران]

اقتباس:     المشاركة الأصلية كتبت بواسطة شهاب الجزيرة  

كابتن محمود

اذا كنت بتشتري من سلسلة مطاعم مشهورة

فسعرها في الاساس مرتفع في الخارج

لان اسعارها موحد في جميع المناطق

لكن مثلا الماء يباع في الخارج بريال

وفي المطار بـ 5 ريال
وبعضهم بـ 10 ريال

ليش وش الرق بين هاذي المويه اللي عندنا والمويه الي في المطار

انا لما اكون في المطار يجي في بالي ان الموية ممكن تكون مقريه او زمزم


لازم يتم توحيد الاسعار في المطار وخارج المطار

بعد لا مفر من ذلك ولازم تدفع
الله يعين بس

تحياتي

[شهاب الجزيرة]

اقتباس:     المشاركة الأصلية كتبت بواسطة إمبراطور الطيران  

بعد لا مفر من ذلك ولازم تدفع
الله يعين بس

تحياتي

والله انا معاك لامفر بتدفع بتدفع


طيب ليش ماتكون الاسعار متوسطه مثلا خارج المطار الماء بريال


في المطار بـ 5 ريال مثلا

تكون في المطار بريالاين او ثلاثة

[محمد97]

معاك حق شهاب الجزيرة .
انااا
لما كنت في مطار جدة سعر البيبسي 7 ريال .
وكمان طعمه موية تعرف وش يعني موية .
شي يقهر والله .
وكل المطارات نفس الشي .
الله يعين .

[kuwaity_pilot]

انا سافرت اكثر من دولة واستخدمت اكثر من مطار بس مثل مطار جدة ماشفت
المطاعم محدودة والاسعار على مزاج صاحب المحل لأن ماكو غير مطعمين وعارف انة الناس جاينة جاينة
المفروض يفتحون اكثر من محل عشان يكسرون الاحتكار وخاصة انة مطار جدة يستدخمة اكثر من 10ملاين مسافر بالسنة يعني كل مافتحت المجال لللمطاعم والمقاهي راح تسهل على المسافر
يعني مثال مطار الكويت ودبي فية اكثر من مطعم وأكثر من مقهى فتلقى من الصعب انهم يرفعون الاسعار وهذا من صالحنا

[alking911]

نفس الشي صارت معايــ في مطار الملكـ عبد الغزيز

جيت بشتري بايسن قال بـ5ريال وخارج المطارـ بريالين ...ع كدا اخذ ريد بول احسن بس قال بـ10 ريال شي يقهر

تبغون حل
كل واحد يأخذ شنطهـ يحط فيها كرسون و موية وبيبسي والي يبغاهــ


والله احنا بعض الاحيان زي كدا

تحياتيـــ

[ساكون طيارا]

اشكرك اخوي شهاب الجزيره

على هذا الطرح المهم جدا

بالفعل ماالحل مع هذه المشكله

انا كنت بجده قبل سنتين

كنت طالب غداء ب60 ريال

وكانت الوجبه تشمل على

نصف حبه رز مع دجاج وصحن سلطه صغير مع واحد بيبسي فقط

يعني لو بطلبها برى ماتجي اكثر من 20 ريال

يعني حنا نقول الفرق يكون اكثر ب5 ريال ب10 ريال

مو باكثر من 40 ريال

[مواطن كويتي]

ربي يعينكم
مطار دبي و الكويت و حتى ماليزيا ما حسيت ولا لاحظت انهم يستغلون حاجات المسافرين كثر مطار جده و مطار طهران فأسعارهم الخياليه عجبه من عجائب الدنيا
لنا و لكم الله

[غسان الطيار]

اخواني معكم حق وكمان في مطار صنعاء الى حدا ما لاكن ما فيه مطاعم بس كفتيريا ومزودين عن الشيء 50ريال او 80او 100